Vo A wie Afang bis J wie Jouvie

Ländlich zwüsched Füchs und Reh ufgwachse, isch mir d Stadt lang en Graus gsi, bis ich entdeckt han, dass es det Konzert, Theater, Musighüser und Instrumänteläde git und richtig ab gaht! Ich hett gern e Lehr imne Musiggschäft gmacht, häd sich aber nöd ergäh. Ich han aber früeh entdeckt, dass d Musig mis Element isch. Mit 9 die erst Musigkassette übercho, mit 11 Bon Jovi entdeckt, e Band wo ich bis hüt heiss liebe und bewundere. Nach es paar Jahr Klavierunterricht hani mich de em Singe gwidmet und bi dem isch es bis hüt bliibe! Alles was schwierig und ungwöhnlich gsi isch, han ich wele covere und bis hüt sing ich inere Blues-Soul-Rock-Coverband. Aber dass ich mit eigene Songs dörf uf d Bühni stah, hett ich mir nie erträumt…bis zu mim 40. Geburtstag.

 Wenn Guets id Wält userüehrsch, chunnt au Guets zu dir zrugg, dass häd sich au min Schatz denkt und mir en Studiotag zu Gunste vo Pink Ribbon Schweiz ersteigeret! Tadaa! Mis Solo-Mundartprojekt JOUVIE isch gebore worde!

Ich bin eifach nume dankbar und freue mich, chunsch au du mit uf mini Achterbahnfahrt…